Concha Blanco consegue o Premio Pura e Dora Vázquez

Concha_Blanco (A Coruña, 1950) resultou gañadora do VI Premio de Literatura Infantil e Xuvenil Pura e Dora Vázquez coa novela Encontros ás agachadas. O premio, dotado con 3.000 euros, é convocado pola Deputación provincial de Ourense, que a editará e distribuirá gratuitamente en centros de ensino, bibliotecas e asociacións de Ourense no ano 2009, logo de fallar o premio convocado para ilustrala. Encontros ás agachadas é un traballo de carácter futurista cunha trama imaxinativa, que defende a interculturalidade e pon de manifesto valores como a amizade. Concha Blanco, autora dunha prolífica obra e gañadora de diferentes premios, traballa actualmente como profesora de Lingua Galega e Literatura non IES Agra de Raíces de Cee.
A narración ten como protagonistas aos rapaces Daniel e a Kano 3, un terrícola e extraterrestre o outro, que se encontran de forma fortuíta a primeira vez e logo vense moitas outras ás agachadas, por ser un problema a estancia de Kano na Terra.
Ambientada en Lires e Cee, os territorios da autora, presenta, por unha banda, unha defensa intercultural con valores positivos como a amizade e a confianza no ser humano, e por outra o perigo ao que o exceso tecnolóxico incontrolable nos pode levar.

Agustín Fernández Paz, Premio Nacional de Literatura Infantil e Xuvenil

Non é sen tempo pois, logo de ser finalista en anteriores edicións e gañar innúmeros premios (Merlín, Lazarillo, Edebé, Raíña Lupa, Rañolas, Barco de Vapor...), por fin Agustín Fernández Paz recibiu o recoñecemento que os lectores do Estado xa lle concederon dende hai anos. O xurado do Premio Nacional de Literatura Infantil e Xuvenil, que organiza o Ministerio de Cultura, distinguiu entre todos os textos infantís-xuvenís o ano pasado, o libro de relatos O único que queda é o amor (Premio Xosé Neira Vilas ao Libro Infantil e Xuvenil do ano 2007, da Asociación Galega de Editores). Publicado xa en castelán e portugués e de inmediata edición en catalán, componse dun conxunto de relatos que dende o eixo do tema do amor presentan diferentes camiños na súa abordaxe, dende a nostalxia e a ausencia do desamor, ás veces marcado polo paso inexorable do tempo, até a celebración do misterio do sentimento que, mesmo sen realizarse, participa dos soños irreductibles.
O amor polos libros e autores maniféstase, tamén, en forma de citas que ás veces son máis que referentes, integrándose con naturalidade no texto formando un banquete literario do que poden gozar os xoves pero tamén os adultos.
A sensibilidade coa que Pablo Auladell fixo o traballo de ilustración crea unha atmosfera na que o lector se mergulla con intensidade e paixón contida ante a que dificilmente se pode permanecer indiferente.

TERESA GONZÁLEZ COSTA GAÑA OS PREMIOS MANUEL MARÍA E ÁLVARO CUNQUEIRO DE TEATRO

Teresa González Costa é a gañadora da edición 2008 dos premios Álvaro Cunqueiro para Textos Teatrais e Manuel María de Literatura Dramática Infantil polas obras Sempre quixen bailar un tango e Pingueiras e tarteiras, respectivamente, mentres que Xosé A. Neira Cruz alzouse co Barriga Verde de Textos para Teatro de Monicreques na modalidade de teatro para rapaces con O punto da escarola. O nome dos autores recoñecidos este ano cos galardóns de literatura dramática que convoca a AGADIC (Axencia Galega das Industrias Culturais) da Consellería de Cultura foi desvelado hoxe pola presidenta do seu xurado, Laura Tato Fontaíña, no acto de inauguración da Feira Galega das Artes Escénicas, que se celebra até o vindeiro venres en diferentes escenarios de Santiago de Compostela.
Laura Tato informou, así mesmo, de que o Barriga Verde quedou deserto na categoría de teatro para adultos. Porén, o xurado quixo deixar constancia no seu ditame da “calidade e o bo nivel” dos textos presentados aos outros tres galardóns, de xeito que foron necesarias “longas deliberacións” para decidir os textos gañadores de entre o total de 54 orixinais candidatos: 28 ao Álvaro Cunqueiro, 10 ao Manuel María, e 16 ao Barriga Verde (13 textos para rapaces e 3 para adultos).
Ambos os gañadores recibirán unha dotación económica de 6.000 € por cada un dos premios. Ademais, segundo establecen as bases, os tres textos poderán ser publicados pola AGADIC nalgunha das coleccións dramáticas que mantén abertas en colaboración con diferentes editoriais galegas. Con Sempre quixen bailar un tango e Pingueiras e tarteiras, Teresa González Costa convértese na primeira autora que ten no seu haber dous dos premios convocados pola AGADIC (anteriormente polo IGAEM): o Cunqueiro e o Manuel María.
O primeiro dos textos, distinguido co XVII Premio Álvaro Cunqueiro para Textos Teatrais, debuxa un escenario de desencontros entre os personaxes que o habitan: Manuel, que se enfronta con serenidade ao final da súa vida; a súa filla mailo seu xenro, aos que a excitación polos plans de futuro os mantén alleos ao drama; e María, a moza encargada da limpeza, que a pesar do seu desencanto coa vida, é a única sensible ao que sucede ao seu carón. O xurado destacou de Sempre quixen bailar un tango a solidez da súa estrutura dramática, cualificándoa como unha obra “moi coidada” e “moi ben construída”, así como a súa intención de ridiculizar valores dominantes na sociedade actual como o afán de poder, a ambición, as aparencias, a superficialidade ou o materialismo, en contraste co “poder salvador dos soños”.
Pola súa banda, o texto gañador do III Manuel María de Literatura Dramática Infantil, Pingueiras e tarteiras, é definido no ditame como unha apoloxía da ledicia e da fantasía que ofrece unha visión atípica e desmitificadora de personaxes arquetípicos. Trátase dunha obra moi lúdica, que recorre a múltiples xogos de palabras para contar como a chegada dunha compañía de circo cambia a vida cor gris nun castelo no que sempre chove.

XOSÉ A. NEIRA CRUZ GAÑA O VI PREMIO BARRIGA VERDE DE TEXTOS PARA MONICREQUES NA SÚA MODALIDADE DE TEATRO INFANTIL

A obra O punto da escarola foi recoñecida co VI Premio Barriga Verde de Textos para Teatro de Monicreques, Neira Cruz artella un divertimento teatral que fai unha homenaxe implícita á profesión de titiriteiro, ao tempo que bota man de personaxes e situacións conectados co imaxinario infantil. Neste caso, o xurado valorou a plasticidade da obra e o enxeño dos seus diálogos, ademais de subliñar o seu “gran sentido do humor e unha utilización moi intelixente da música”.
Ademais de por Laura Tato Fontaíña, como presidenta, o xurado da edición 2008 dos tres premios literarios da AGADIC estivo integrado por Emilio Xosé Insua López, Roberto Salgueiro González, Marica Campos, Carlos Ignacio Labraña Barrero e Andrea Bayer Lloves como vogais. As súas decisións respecto de todos os galardóns outorgados foron tomadas por maioría dos seus membros.

Xosé A. Neira Cruz (Santiago de Compostela, 1968) é escritor, xornalista e profesor da Facultade de Ciencias da Comunicación da Universidade de Santiago. Deuse a coñecer como narrador en 1988, cando foi recoñecido co Premio Merlín por Ó outro lado do sumidoiro. Dende entón, ten acadado numerosos galardóns como o Barco de Vapor en 1997 con Valdemuller e en 1999 con Os ollos do tangaleirón; o Merlín, que volveu gañar en 2000 por As cousas claras; o Premio Raíña Lupa en 2002 por O armiño dorme; e o Premio Lazarillo en 2004 polo texto de teatro infantil A noite da raíña Berenguela. A súa obra tamén foi destacada con dous Premios Lecturas (concedidos polos lectores das bibliotecas galegas), e foi seleccionada pola Biblioteca Internacional da Xuventude de Múnic para a Lista de White Ravens e polo Banco del Libro de Venezuela, que considerou en 2006 que a súa novela O armiño dorme era unha das dez mellores obras xuvenís do mundo publicadas nese ano.
Se ben a meirande parte da súa produción literaria está inscrita na narrativa, tamén frecuentou o xénero teatral e dúas das súas pezas foron levadas a escena recentemente: Cando a noite cae, representada pola compañía Teatro da Falúa en 2007 e galardoada co 2º Premio GZCrea de teatro afeccionado convocado pola Vicepresidencia da Xunta de Galicia, e Valdemuller, adaptada polo Centro Dramático Galego baixo a dirección de Pablo Vergne. No eido da poesía, foi galardoado en 2007 co Premio Fiz Vergara Vilariño pola obra De esparto e seda (Espiral Maior, 2008).
Á parte da súa faceta de creador, dedícase á investigación no ámbito do xornalismo e da literatura infantil, e fundou a revista Fadamorgana de literatura infantil e xuvenil, da que é director.

VALENTÍN ARIAS HOMENAXEADO NO DÍA INTERNACIONAL DA TRADUCIÓN

Con motivo do Día Internacional de Tradución, Valentín Arias López, un dos tradutores pioneiros na editorial, recibiu unha merecida homenaxe nun acto que se celebrou, ás 19:00 horas, no auditorio do centro sociocultural de Caixanova de Vigo o día 30 de setembro.
Valentín Arias López naceu en Sarria en 1934. En 1969 comezou a traballar coa editorial Galaxia e posteriormente, a partir de 1980, con Edicións Xerais de Galicia, como autor dos primeiros libros educativos e tradutor dos títulos das primeiras coleccións xuvenís da editorial, especialmente de «Xabarín». Foi membro fundador en 1984 da Asociación de Tradutores Galegos, da que foi presidente. Traduce fundamentalmente do francés, do portugués e do español. En 1989 recibiu o premio Ramón Cabanillas de Tradución, e o Premio de Tradución Xuvenil do Ministerio de Cultura. Entre as súas moitas traducións atópanse as obras de Jules Verne A volta ao mundo en oitenta días, Viaxe ao centro da terra e Da Terra á Lúa, Voo de noite de Antoine de Saint-Exupéry, O estranxeiro de Albert Camus e A fractura do miocardio de Jacques Fansten. Tamén traballou no equipo que traduciu O enxeñoso fidalgo don Quixote da Mancha. Ademais publicou numerosos artigos sobre a tradución e a función do tradutor, en especial en países con linguas minorizadas

ARNAL BALLESTER, PREMIO NACIONAL DE ILUSTRACIÓN

O Ministerio de Cultura elevou á categoría de "Premio Nacional" o premio de ilustración, que dende este ano se outorga a un ilustrador/a polo conxunto do seu traballo no eido da literatura infantil e xuvenil e non, como ata agora, por unha soa obra.
ARNAL BALLESTER
Arnal Ballester (Barcelona, 1955) foi galardoado co Premio Nacional de Ilustración 2008. Está dotado, como o resto dos Premios Nacionais de Literatura, con 20.000 euros; é indivisible, non pode declararse deserto nin concederse a título póstumo.
Arnal Ballester é licenciado en Historia pola Universidade Autónoma de Barcelona. Comezou a colaborar en revistas de humor gráfico na década dos sesenta. Na actualidade dedícase a ilustrar libros para nenos e ademais cultiva outras facetas artísticas como o cartelismo e o debuxo animado. É profesor de ilustración na escola Massana de Barcelona e na Escola Professional da Dona.